| Forsíða | Starfsmenn | Gestir | Fréttir | Tenglar | Innri vefur

Þjóðfræðasafn

Á Íslandi er ekki sérstök þjóðfræðastofnun, en það hefur fallið í hlut Árnastofnunar og þjóðháttadeildar Þjóðminjasafns Íslands að sinna þeim fræðum. Á vegum stofnunarinnar og að nokkru leyti í samvinnu við aðra, einkum Ríkisútvarpið, hefur mikið þjóðfræðaefni verið hljóðritað á segulbönd. Að því hafa einkum unnið Hallfreður Örn Eiríksson, sem frá upphafi hefur verið ráðinn að stofnuninni til þess að sinna þjóðfræðum, og þau Jón Samsonarson og Helga Jóhannsdóttir, sem söfnuðu efni á árunum 1963-71.

Þessir fræðimenn hafa ferðast um landið þvert og endilangt, farið heim á bæi, talað við fólk og tekið upp sögur, lýsingar á þjóðháttum og atvinnuháttum, kvæði, sálma, þulur, rímur, lausavísur og margt fleira og er það ýmist mælt fram, sungið eða kveðið. Einnig var gamalt fólk í Reykjavík heimsótt, bæði á heimili þess og á elliheimili.

Þjóðfræðaefni hefur þannig verið safnað í öllum sveitum landsins og einnig í Íslendingabyggðum vestan hafs. Nú er hægt að lesa og hlusta á nokkrar sögur úr Vesturheimi af sérstökum vef Árnastofnunar.

Í safninu eru einnig minni söfn nokkurra annarra fræðimanna og áhugamanna og auk þess afrit af þjóðfræðaefni frá Ríkisútvarpinu, af efni sem er í eigu Þjóðminjasafns Íslands og af upptökum Kvæðamannafélagsins Iðunnar. Elsta efnið í segulbandasafninu eru afrit af þjóðlögum sem hljóðrituð voru á vaxhólka á árunum 1903-1912.

Nærri lætur að stofnunin eigi nú eða varðveiti 2000 klukkustunda segulbandsupptökur með efni af þessu tagi.